Magtiayong Camasura na King ug Queen

CEBU, Philippines - Ang magtiayong Alex ug Alice Camasura nga taga barangay Talamban ning dakbayan sa Sugbo maoy napili-an nga King Humabon ug Queen Juana sa pagsaulog sa kapistahan ni Sr Sto. Niño karong tuiga.

Si Alex Camasura, 55, retiradong kontraktor ug ang asawa niini nga si Alice Camasura, 55 usab kinsa   nagtrabaho sa Ludo and Luym Company , may 3 ka mga anak nga pulos lalaki kinsa pulos na usab mga professional.

Ang magtiayong Camasura maoy nangulo sa gipahigayung re-enactment sa pagsulod sa Kristyanismo dinhi sa Sugbo, didto sa Pilgrim center sa Basilica del Sto. Niño kagahapon human sa fluvial procession nga gipangulohan sa bag-ong Arsobispo sa Sugbo Jose Palma.

Gibutyag ni Alex dihang na interview sa Bantay Radyo nga nakalitan ug nasurprisa gyud sila sa pagkasayod nga sila maoy napiling King Humabon ug Queen Juana niadtong Enero 4 ning tuiga.

Gihulagway kini sa pamilyang Camasura nga blessing ug coincidence ingon man pagtabon sa ilang mga sala nga giangkon ni Alex nga dili gyud masukod ang ilang gibati nga kalipay.

Matud pa ni Alex nga siya gikan sa pagkabata nga nagsugod na nagdebosyon sa Sto. Niño ingon man ang iyang tibuok pamilya.

Gipasabot sa magtiayong Camasura nga wala gyud sila masayod sa proseso pagpili sa King ug Queen Juana mao nga nakalitan sila pagkasayod nga sila’y napilian.

Niadtong milabay’ng tuig ang magtiayong Tony Decatorya ug Carmen Decatorya maoy napili-ang King Humabon ug Queen Juana. (BANAT NEWS)