Multicab nalimbuwad 1 angol

CEBU, Philippines - Naangol ang usa sa mga pasahero sa usa ka multicab nga pasaheroan nga nalimbuwad didto sa barangay Kabulakan, barangay Guadalupe, ning dakbayan sa Sugbo kagahapon sa hapon.

Ang biktima mao si Leonela Bautista, 48, nga taga Lower Kalunasan ning dakbayan sa Sugbo.

Sa iyang taho ngadto sa DYAB, iyang gibutyag nga miagi sila og usa ka sagkaon nga dalan paingon sa Guadalupe dihang namatyan sa makina ang sakyanan.

Busa miatras ang maong jeep ug natuwad didto sa lupot ug maayong pagkaparok sa iyang ulo sa sulod sa sakyanan, samtang ang iyang mga tiil nangalubag usab.

Ang drayber sa maong multicab nga si Shien Bellena Gabayan mibutyag usab sa DYAB nga napugos siya sa pag-agi didto sa maong karsada sa paglikay nga di mabara gumikan sa kahuot sa trapiko ilabi na gipangusab ang rota sa mga sakyanan ning siyudad gumikan sa Sinulog.

Matud pa ni Gabayan nga dangog usab kaayo ang karsada gumikan sa kusog nga pagbundak sa uwan kagahapon sa hapon.

Maayo nalang kay bisan nalimbuwad ang iyang sakyanan, si Bautista ray nabun-og sa tanan niyang mga pasahero.

Gumikan kay wala man kaayo magrabihe , wala nalang maghunahuna si Bautista nga mokiha pa kang Gabayan. (BANAT NEWS)