Nagduelo duha patay

CEBU, Philippines - Duha ka tawo nangamatay human gidudahang nagdwelo kagahapon sa kaadlawon diha sa dalan Rabaya, barangay Tabunok, dakbayan sa Talisay.

Naabtan na lang sa mga polis nga nagbuy-od diha sa karsada ug naligo sa kaugalingong dugo si Ryan Villaver Cabuenas, 25, taga barangay Lagtang, sa nahisgutang siyudad ug Jhasper Lopez, 33, taga barangay Bulacao gikatahong kanhi sundalo.

Ang duha parehong nakaangkon og usa ka samad pinusilan sa walang bahin sa ilang mga dughan ug pareho usab kining wala na makaabot nga buhi ngadto sa Talisay City District Hospital.

Na-recover nila ni PO3 Alfredo Cuizon, PO2 Henry Mata ug PO1 Jundave David sa lugar nga nahitaboan ang usa ka slug sa wala mapihong kalibre sa armas ug usa ka kalibre .357 nga revolver diha duol sa nahimutangan ni Cabuenas.

Si PO3 Edwin Alvarado, duty desk officer sa Talisay City Police Station nga nahinabi sa Banat News kagahapon mibutyag nga si Lopez nabiktima sa tulis niadtong milabay’ng Domingo sa kaadlawon diha sa Tabunok nga binuhatan sa unom ka tulisan.

Human sa hitabo, si Lopez nangunay og pangita sa mga tulisan nga mitulis kanila ug nianang Lunes sa gabii, Enero 10, 2011 nasikop ni Lopez si Jared Garban nga taga Mansueto Subdivision, barangay Bulacao, Talisay kinsa usa sa giingong mitulis kaniya.

Si Garban gitugyan ni Lopez ngadto sa Talisay City Police Station ug napasakaan na kini og kaso sa milabay’ng adlaw diha sa Talisay City Prosecutors Office.

Human sa pagkadakop ni Garban wala gihapon mohunong og pangita si Lopez sa ubang mga tulisan hangtud nga kagahapon sa kaadlawon nag-abot si Lopez ug Cabuenas diha sa usa ka imnanan sa dalan Rabaya.

Si Alvarado nagkanayon nga si Cabuenas giingong sakop sa Alpha Kappa Rho ug gituohan nga kauban niini ang mga tulisan nga mitulis kang Lopez. Base sa nahipos nga report sa kapolisan nga sa wala pa mahitabo ang insidente si Lopez ug Cabuenas giingong nagtinutukay ug nanggawas ug diha na mahitabo ang dwelo.

Ang kapolisan sa Talisay nagpahigayon og follow-up nga imbestigasyon sa hitabo. (BANAT NEWS)