CEBU, Philippines - Patay diha dayon ang usa ka ex-convict human giambusan sa tulo ka armadong mga tawo niadtong Biyernes sa hapon diha sa sitio Tangke sa barangay Mambaling siyudad sa Sugbu.
Ang biktima giila sa kapulisan nga mao si Ricardo Genses, taga sitio Tinabangay sa nahisgutang barangay kinsa sumala pang PO2 Jodan Batucan sa Homicide Section bag-ohay palang nakagawas sa Cebu City Jail tungod sa kasong pagpanulis.
Matud pa ni Batucan ang biktima naglakaw niadtong higayona paingon sa sudlonon nga bahin sa nahisgutang lugar pasado alas-3 sa hapon aron unta mobisita sa iyang anak apan giatangan kini sa suspek nga naila lang sa pangalan nga Levy Tan nga mipusil kaniya makadaghang higayon nga miresulta sa iyang kamatayon.
Si Tan adunay laing duha ka kauban nga wala pa mailhi sa kapulisan nga giingong nagsilbing look-out atol sa maong pagpamanhig. Ang tulo daling nanakay og motorsiklo ug miikyas subay gihapon sa sudlonong bahin diha sa maong dapit.
Ang biktima nakaangkon og samad pinusilan sa tiyan, tuong abaga diin ang bala milusot ngadto sa iyang dughan nga gituuhan nga maoy namatyan niini.
Ang mga mirespondeng kapulisan nakarekober sa crime scene og duha ka empty shell sa gituohang kalibre .45 nga maoy gigamit sa suspetsado pagpusil ngadto sa biktima.
Nagtuo si Batucan nga adunay atraso ang biktima sa suspek.
“Atraso jud na kay pareha man na silang duha mga notadong tulisan nya hawod-hawod sad. Noted sad na siya (victim) nga badlungon sa area,” matud pang Batucan ug midugang nga ang mismong pamilya sa biktima wala makahibawo kung kanus-a lang kini nakagawas sa City Jail. (BANAT NEWS)