CEBU, Philippines - Dul-an sa usa ka gatus ka mga sakayan ang nagpalista nga moduyog sa fluvial procession karong kaadlawon sa Senyor Sto. Niño nga manukad sa Mandaue Ouano Wharf.
Apan sa dili pa mobiya ang Sto. Niño ug Birhen sa Guadalupe sa St. Joseph National Shrine, usa ka send off mass una ang ipahigayon sa alas-4 sa kaadlawon.
Si Petty Officer 2 Gerry Patenio nga nahinabi sa Banat News miingon nga 91 ka barko ug motorbanca maoy ilang natala hangtod sa katapusan na nilang pagdawat niadtong Huwebes sa hapon.
Ang nagparehistro nga mga sakyanan sa kadagatan nga moapil gilangkoban sa 24 ka mga barko, 45 ka mga fishing boats ug 22 ka mga pumpboats.
Gitataw niya nga ang mga barko nga makakarga og 300 ka mga tawo gilimitahan lang sa 250 ka mga tawo samtang ang fishing boats nga gitugotan sa pagsakay sa 15 ka mga crew gitugotan lang napulo ug ang mga pumpboats nga makadala og 20 ka tawo ilang gilimitahan lang sa 15 ka tawo.
Sa nasayran sa tigpamaba sa coast guard sa Sugbo nga si Captain Anelito Gabisan nga sayo pa sa kaadlawon hawanan sa mga sakyanan sa kadagatan ang Mactan Channel ug tak-upan una kini hangtud nga di matapos ang prosisyon.
Ang imahen ni Senyor Santo Niño uban sa imahen sa Birhen sa Guadalupe anha isakay sa M\V Trinidad ug kini mamidpid sa habig sa dakbayan sa Lapulapu hangtod nga mopaingon sa pagsuong sa Marcelo Fernan Bridge ug mopadayon sa iyang paglawig paingon sa Pier 1 sa dakbayan sa Sugbo.
Gipaabot nga libuan ka mga deboto ang magpaabot kanila diha sa pantalan aron manguyog sa prosesyon paingon ngadto sa Basilica Minore del Sto.Niño.
Apan si Commander Rolando Punzalan mipasidaan nga gidid-an gyud nila ang pagsalmot sa mga barko nga wala marehistro aron paglikay sa disgrasya. Aron pagsegurado sa seguridad sa fluvial procession ang mga sakop sa Coast Guard ug Philippine Navy magtabang sa pag-marshall sa mga manguyog nga barko.
Higpit usab nga ipatuman ang no overloading, no firecracker ug ingon man no liquor samtang magsakay sa mga barko ug motorbanca nga mosalmot sa procession. (BANAT NEWS)