Traslacion gihugopan sa mga deboto

CEBU, Philippines - Gihugopan sa pagtagbo sa liboan ka mga debotos sa dakbayan sa Mandaue ang pagbisita sa imahen ni Senyor Santo Niño sa gipahigayong traslacion nga gihimo kagahapon sa buntag.

Ang mga debotos gikan sa dakbayan sa Sugbo uban sa kaparian ug mga opisyal sa kagamhanan gikan sa dakbayan sa Sugbo nga gipangulohan ni Mayor Michael Rama mihatud sa Senyor Santo Niño ug Birhen sa Guadalupe diha sa Saint Joseph Parish Church sa Mandaue.

Ang traslacion nahimo nang tradisyon sa duha ka dakbayan sukad pa kaniadto ug ibalik ang mga imahen gikan sa dakbayan sa Sugbu karong buntag pinaagi usab sa fluvial procession.

Gisugat ang mga imahen diha sa utlanan nga bahin sa barangay Subangdaku sa dakbayan sa Mandaue sa kaparian ug mga opisyal sa kagamhanan sa dakbayan sa Mandaue nga gipangulohan ni Mayor Jonas Cortes ug Bise Mayor Glenn Bercede.

Si Gob. Gwendolyn Garcia kinuyogan sa pipila ka mga opisyal sa kagamhanan sa lalawigan ang kauban nila ni Mayor Cortes kagahapon.

Ang dalan sa M.C. Briones sa barangay Subangdaku hangtod na sa dalan A. del Rosario sa barangay Guizo, Mantuyong ug barangay Centro napuno sa mga dayandayan diin sa kadaplinan may gipahimutang nga mga altar nga gipatungan sa nagkadaiyang imahen ni Senyor Santo Niño.

Ang mga debotos nga naglumbay sa kadalanan sa maong lugar ang mipakita sa ilang paghangop sa paghidangat sa imahen ni Senyor Santo Niño ug sa Birhen sa Guadalupe pinaagi sa pagkawaykaway sa ilang mga kamot, pagsabwag og mga bulak.

Nagkadaiyang grupo sa mga tinun-an nga lakip sa misugat sa imahen ni Senyor Santo Niño kinsa mihalad pa og sayaw sa Sinulog sa matag higayon nga molabay na kini sa ilang nahimutangan.

Ang pipila kanila mipalupad pa og balloon ug adunay nagpaboto pa og rebentador.

Sa sulod sa National Shrine of Saint Joseph nga nahimutang sa barangay Centro gihimo ang usa ka Santos nga Misa nga gidumala sa kura paroko sa maong simbahan nga si Monsenyor Adelito Abella nga gitambongan usab sa mga debotos. (BANAT NEWS)