Oaminal miawhag, kawani ipa-drug test

CEBU, Philippines - Gi-awhag ni kanhi Dangerous Drugs Board (DDB) Undersecretary Paul Clarence Oaminal si Regional Director Judith Chicano sa Civil Service Commission (CSC)-7 nga pahinumdoman si Department of Interior and Local Government (DILG-7) Regional Director Pedro Noval nga mopahigayon og mandatory drug testing sa tanang mga pinili ug tinudlo nga opisyal sa gobyerno lakip na ang mga bag-ong midaog sa milabay’ng election sa barangay.

Ang lakang ni Oaminal may labot sa giluwatang memorandum circular no. 13. series sa 2010 niadtong Hulyo 28, ni CSC Chairman Francisco Doque nga nag-obligar sa tanang mga department head sa mga nasudnon ug local nga buhatan sa gobyerno apil na kadtong mga government owned and controlled corporation nga ipaubos og drugtest.

Kini gitumong aron paglimpyo sa tanang buhatan sa gobyerno gikan sa mga kawani ug opisyal nga nagumon sa gidiling drugas ug nagsuporta usab kini sa lakang sa DDB nga nagduso sa mandatory drug testing alang niadtong mga mo-apply ug matudlo sa bisan unsang posisyon sa gobyerno.

Gani gipadayag ni Oaminal nga angay nga ilakip sa DILG ang tanang mga tinudlo nga kawani sa mga local nga kagamhanan ug kabarangayan.

Si Oaminal miingon nga gilimut-limotan ra kining maong direktiba taliwala sa pagsi-aw karon sa mga gidiling drugas nga gikabuangan usab sa pipila ka mga opisyal ug kawani sa gobyerno. (BANAT NEWS)