CEBU, Philippines - Nalandig sa tambalanan ang usa ka lalaki human kini dunggaba sa wala hiilhing kriminal samtang nagtan-aw sa nagduwa og baraha nga tong-its didto sa Bernardino St.,sitio Gochan Ibabao sa barangay Mambaling siyudad sa Sugbo sa miaging hapon.
Ang biktima giila sa Homicide Section nga si Carlito Manlayas, 44, minyo, lumad nga taga Siari, Zamboanga Del Norte ug bag-ohay palang nanimuyo diha sa nahisgutang lugar uban sa iyang pamilya.
Sa pasiunang pakisusi sa Homicide Section nila ni PO3 Victor Ruel Ayuman, PO3 Geoffrey Gutual, PO3 Julius Mabunay ug PO2 Cristobal Geronimo nasayran nga ang biktima nalingaw nga nagsud-ong sa mga nagduwa og baraha nga tong-its.
Apan wala siyay kalibotan nga ang kriminal hilom nga miduol kaniya ug walay tingog-tingog nga gikalitan og hansak sa kutsilyo niini ang iyang tuong kilid.
Ang asawa nga si Leonora daling midala sa iyang bana ngadto sa Cebu City Medical Center (CCMC) samtang ang kriminal dali kaayong nakasibat.
Nagtuo ang kapolisan nga gikasuyaan ra ang biktima sa maong lugar. (BANAT NEWS)