500 bulb gihatag sa Philips sa CCMC

CEBU, Philippines - Mihatag og di mominos 500 ka mga fluorescent bulbs ug ballast ang kompanya nga Philips Electronics & Lighting Inc. ngadto sa Cebu City Medical Center (CCMC) kagahapon sa buntag didto sa opisina sa mayor sa Sugbo.

Diin 400 ka buok niini ang 36 watts nga nagkantidad og 73 pesos matag usa ug 100 ka buok niini ang 18 watts nga tag 64 pesos ang usa.

Mobalor og kapin sa P36 mil ang gigahin sa Philips nga budget alang sa mga suga. Diin lakip kini sa ilahang programa nga “The Philips’ Bright Inc: Energy Saving Bulbs for a Greener Tomorrow.”

Si Joel Tanato sa Philips dihang nahinabi sa mga tigbalita, mibutyag nga ang maong mga suga adunay 20 porsiyento nga maka-save sa kuryente ug laing 20 porsiyento nga gidugayon sa kahayag niini kun longevity. Dugang pa niya nga mas barato kining maong mga suga ug garantisado pa nga gamiton.

Matud pa ni Mayor Michael Rama nga ang Cebu Medical Center alang sa katawhan kay kini gitawag og ‘People’s Hospital’ mao nga angayan kining tagaan sa mga importanteng gikinahanglan para sa paghatag og saktong serbisyo sa mga pasyente. (BANAT NEWS)