Lapulapu, Cordova alerto para sa turista

CEBU, Philippines - Gumikan sa pagdagsang sa mga langyaw’ng turista sa dakbayan sa Isla sa Mactan gumikan sa "Sinulog 2011" ang kapolisan sa Lapulapu ug Cordova mipahugot sa seguridad ug mipaubos sa "red alert status."

Matud pa ni Lapulapu City Police Office Director Sr. Supt. Anthony Obenza andam unta sila nga moabag sa dakbayan sa Sugbu sa pagpadala sa iyang mga sakop sa Theft and Robbery Section atol sa fluvial procession ug sa Sinulog Grand Parade ugma apan dili usab nila kabiyaan ang seguridad sa mga turista sa dakbayan sa Lapulapu.

Gikumpirmar ni Obenza nga base sa ilang panagtigom uban sa mga hotel owners ug managers puno na gyud ang tanang mga hotels ug mga ginagmay’ng resorts sa dakbayan sa Lapulapu sa mga turista lokal man o langyaw.

Gumikan niini iyang gialerto ang iyang mga sakop sa Tourist Police ug ang iyang tanang mga sakop alang sa hugot nga seguridad alang sa mga        turista.

Atol unya sa fluvial procession pipila ka sakop niini ang ipakatap nga dili mag-uniporme aron sa pagpaniid sa mga ginagmay’ng krimen sa palibot ilabi na sa mga dapit nga magpunsisok ang katawhan ug sa unang taytayan nga nagkutay sa dakbayan sa Mandaue ug Lapulapu.

Samtang sa lungsod sa Cordova si Cordova Police Station Chief Sr. Insp. Felix Pacaldo mipaubos sa red alert status sa kapolisan diin bisan pa sa kagamay sa mga dapit nga adunay mga hotels ug resorts sa maong lungsod apan nasayran nga puno usab kini sa mga dumoduong nga buot mosaksi sa Sinulog.

Gumikan niini ang kanunay nga pagpatrolya maoy usa sa mga lakang nga ilang gihimo aron sa pagsumpo sa mga badlungon sa maong lungsod.  (BANAT NEWS)