Gown ni Gwen talagsaon

CEBU, Philippines - Giangkon ni Gobernador Gwendolyn Garcia nga dili kasagaran ang iyang sul-obon nga gown atol sa iyang pagsayaw sa Sinulog Mardigras ugma.

Kini tungod kay pinalahi ang tabas ug estelo sa iyang gown kay dili usab bastabasta ang designer sa maong bistida.

Gusto sa gobernador nga kutob sa magtan-aw sa iyang isul-ob, maglaway ug maibog sa katahom ug katalagsaon niini nga dili hitupngan ni kinsa man.

Ang sastre sa gobernador nga maoy tigpahaom sa iyang biste mao si Carry Santiago usa ka Cebuano fashion designer nga ilado kaayo sa natad sa fashion dili lamang dinhi sa Sugbo kun dili sa tibuok nasud ug sa gawas sa nasud.

Matud pa sa gobernador nga mahalon ang iyang pagasul-obon nga gown apan iyang gitataw nga ang kwarta nga iyang gigamit sa pagpalit niini wala magagikan sa kwarta sa kagamhanan sa lalawigan sa Sugbo kun dili gikan sa iyang kaugalingong bulsa ug kuwartang hinagoan.

Nasayran nga makapito na kahigayon nga nisayaw si Garcia sa Sinulog Mardigras ug sa matag tuig nagkalainlain nga Sinulog gown ang iyang sul-obon.

Niining tuiga, ang gobernador mosayaw uban sa mga dancer sa Bonga Festival sa lungsod sa Sibonga kansang kapistahan sa matron sa lungsod ang Our Lady of Pilar nadungan sa adlaw nga natawhan ni Gobernador Garcia. (BANAT NEWS)