Gullas nagpasalamat sa taga Talisay

CEBU, Philippines - Si Kongresista Eduardo Gullas sa unang distrito sa probinsiya sa Sugbo miangkon nga dili siya lumad nga Talisaynon apan labaw pa siya sa lumad sa maong dapit, atol sa iyang pagpamulong sa gipahigayong testimonial dinner niadtong Martes sa gabii didto sa city hall ground atol   sa ika-10 nga kasaulogan sa Charter Day sa Talisay sa Enero 12, 2011.

Nagpasalamat si Gullas nga bisan dili siya lumad sa Talisay apan gihatagan siya og kahigayonan sa taga Talisay nga makaserbisyo isip mayor sa siyudad niadtong tuig 2001, nga alang kaniya mas labaw pa siya sa usa ka lumad nga Talisaynon tungod sa pagpamahal ug kahinangop nga gipakita sa taga Talisay kaniya.

Ang isyu bahin sa dili niya pagka-lumad nga Talisaynon kanunay nga gikulitog ug giukit sa iyang mga kaatbang sa politika ilabi na sa panahon sa eleksyon ug gani bisan ang iyang apo nga si Konsehal Eduardo Gullas III wala makaikyas sa maong isyu.

“I am particular honored and pleased about being called the father of the city of Talisay because no other man can rightfully claim such a distinction,” matud sa Kongresista.

Hinuon matud niya nga isip usa ka magbabalaod sa kongreso katungdanan niya ang magpanday og balaod ug moduso og mga balaodnon ug gani daghan na siyang napangamahanan nga mga balaodnon diin nakabenepisyo niini ang unang distrito sa probinsiya, dakbayan sa Talisay ug ang tibuok nasud.

Gilakbit ni Gullas sa iyang speech ang kabahin sa kaso sa 16 ka mga bag-ong siyudad nga nag-atubang og kaso aron kini mabalik sa paglungsod. Ang Naga, Carcar ug Bogo sa lalawigan sa Sugbo nahilakip sa 16 ka mga siyudad nga nag-atubang og kaso sa Korte Suprema.

Matud sa Kongresista nga nasuta nila nga ang Korte Suprema atras abante sa desisyon niini sa kaso sa 16 ka mga bag-ong siyudad.

“The Supreme Court decision is being doing back and fort like a pendulum of a clock, this time towards the extreme right and then at the other time to the extreme left, and perhaps after the case is finished I would no longer the father of the city of Carcar and Naga, I would be rightfully grandfather,” ni Gullas pa. Kagahapon sa buntag sa adlaw sa pagsaulog sa pagkahimong dakbayan sa Talisay may gipahigayong Misa Konselebrada didto sa city hall ground sa alas 7:30 sa buntag.

Human sa maong misa gipahigayon ang dinungan nga mass feeding sa 22 ka mga barangay sa siyudad. - BANAT NEWS