Artsidiyosisi sa Sugbu pamunoan na ni Arsobispo Jose Palma

CEBU, Philippines - Pangulohan na unya sa bag-ong Arsobispo sa Sugbu nga si Archbishop Jose S. Palma ang Simbahan sa Sugbu hulip sa posisyon nga biyaan ni outgoing Cebu Archbishop Ricardo J. Cardinal Vidal karong alas-9 sa buntag.

Ang instalasyon ni Palma ipahigayun diha sa Cebu Metropolitan Cathedral nga giatangang tambungan gatusan ka mga tawo nga maglakip sa kapin 80 niya ka paryente, lakip na ang lima niya ka igsuon ug inahan.

Anaa usab ang 70 ka bishops ug 700 ka mga pari, 90 niini nagagikan sa Archdiocese sa Palo, Leyte, diin nahimong Arsobispo si Palma sulod sa lima ka tuig.

Kagahapong adlawa, puno sa kahinangup nga gisugat sa mga Sugbuanon si Palma sa pagpangulo ni Cebu Gob. Gwendolyn Garcia ug Cebu City Mayor Michael Rama. Si Palma miabot sa Mactan Cebu International Airport sa alas-3:00 sa hapon.

Si Palma kinsa giubanan ni Papal Nuncio Archbishop Edward Joseph Adams, mipahigayun og motorkada paingon ngadto sa bag-o niyang pinuy-anan, apan sa wala pa kini milahos didto sa Archbishop’s Palace, mihapit una si Palma sa National Shrine of Saint Joseph sa barangay Centro, syudad sa Mandaue.

Atol sa motorkada, mipakatap og mga sakop sa kapolisan ang Police Regional Office Visayas (PRO-7) nga maoy mipatuman sa seguridad ug kahapsay hangtud nga miabot si Palma sa palasyo.

Pag-abot niya sa Archbishop’s Palace, gisugat si Palma sa iyang hulipan nga si Vidal ug dungan sila nga mipahigayun og halad sa pag-ampo didto sa Chapel sa Archbishop’s Palace.

Ang mga Sugbuanon mipakita sa ilang paghangop kang Palma diha palang sa dakbayan sa Lapulapu dihang ang mga tawo ug mga tinun-an naglumbay sa dalan pag-agi sa motorkada samtang si Palma mikawaykaway sa mga kamot niini. - BANAT NEWS