CardinalVidal gipasidunggan

CEBU, Philippines - Gipasidunggan sa mga opisyal sa kagamhanan sa dakbayan sa Mandaue ang miritero nga arsobispo sa Sugbo nga si Ricardo Cardinal Vidal niadtong miaging buntag human sa gipahigayong katapusang misa sa Basilica Minore del Santo Niño sa dakbayan sa Sugbo.

Ang pagpasidungog ilang gipaagi sa gipalabang nga resolusyon sa konseho nga giaprobahan usab ni Mayor Jonas Cortes.

Si Mayor Cortes ug mga sakop sa konseho sa dakbayan maoy mitunol sa maong resolusyon ngadto kang Cardinal Vidal uban sa pagpasalamat sa mga nahimo sa mga Mandauehanon nga nakapalig-on sa Kristohanon niining pagtuo.

Sa nasayran nga si Cardinal Vidal maoy naningkamot nga ang simbahan ni Senyor San Jose sa barangay Centro sa dakbayan nga madeklarar isip National Shrine of Saint Joseph.

Kini usab ang nahimong kahimanan sa pagdugang pa og pito ka mga simbahan sa nagkadaiyang barangay sa dakbayan nga naglakip sa Fatima Church sa barangay Basak, Getchemane Churh sa barangay Casuntingan, Santo Niño Church sa barangay Paknaan, Christ the King sa barangay Alang-Alang ug uban pa.

Si Cardinal Vidal nga miritero na sa pagka-arsobispo sa Sugbo gipulihan usab ni Archbishop Jose Palma nga kanhi arsobispo sa Palo, Leyte.

Miabot kagahapon sa hapon si Bishop Palma sa Sugbo ug gisugat kini sa kaparian ug mga opisyal sa kagamhanan sa Sugbo uban sa mga tawo kinsa mihangop kaniya. - BANAT NEWS