Nang-hostage napusilan sa SWAT

CEBU, Philippines - Usa ka lalaking gialarma sa kapulisan tungod sa taho nga armado ug nang-hostage, gipusil sa mirespondeng pulis human giingong misuway og dunggab sa awtoridad.

Nahitabo kini sa miaging alas-8 sa buntag diha sa Asuncion St,. sa barangay Sambag Uno ning siyudad apan na-report sa buhatan sa Homicide Section niana nang pagkahapon.

Suspetsado giila sa kapulisan nga mao si Romeo Caballero, 42, alyas “Sadam” ug molupyo sa nahisgutang lugar kinsa napusilan sa iyang wala nga tiil human misuway sa pagdunggab kang PO2 Eden Trangia, sakop sa Special Weapons and Tactics (SWAT) team nga miresponde sa maong alarma.

Segun pa sa taga Mobile Patrol Group (MPG) nga una nilang nadawat ang trouble alarm hinungdan nga daling miresponde ang Car 019 apan pag-abot sa maong lugar nangayo sab dayon og back-up kay armado ang ilang girespondehan.

Ang Car 004 nga giluwanan ni PO2 Trangia ug mga kaubanan miresponde ug ilang giadto ang balay sa suspetsado nga giingong nigamit og tubo nga may gitas-ong 27 ka pulgadas ug kutsilyo.

Matud pa sa kapulisan nga misuway pagsukol sa mga pulis si Caballero ug misuway sa pagdunggab kang Trangia hinungdan nga napugos ang maong pulis pagpusil kaniya aron sa pag-neutralized niini.

Si Caballero nga na-interbyu sa DyHP kagahapon sa buntag mihimakak sa pasangil nga iyang gisuwayan sa pagdunggab si Trangia.

“Ayaw ko dakpa ninyo kay wa’ man koy sala, ang tubo ug kutsilyo diha ra sa bangko, ila kung gipagawas,..wala ko mogawas kay gadala man sila og “taming”, gisaka ko nila, gipatiran nila ang pultahan,” matud pa niini sa maong interbyu.

Si Pablo, ang amahan ni Caballero mitug-an usab nga diha ra siya sa gawas sa ilang balay nga namanday.

“Palayo manong kay maapil niya ka,” matud pa sa amahan nga iyang nadungog gikan sa mga polis ug diha-diha nadunggan niya ang nagsunod nga tulo ka buto sa armas ug sa dihang iyang gitan-aw naigo na ang iyang anak sa walang tiil.

Matud sa amahan nga ang iyang anak ra maoy diha sa sulod sa ilang balay niadtong higayona ug dili tinuod nga nang-hostage kini subay sa report nga nadawat sa kapulisan.

“Nagsugod ra man ‘to sa sininggitay sa akong anak ug sa ginganlan og Butoy,” dugang pa sa amahan.

Ang mga pulis mao na usab ang midala kang Caballero ngadto sa tambalanan. Gituohan nga naigo ang bukog sa tiil ni Caballero human gisemento sa mga doktor nga miatiman kaniya gitanggong sa Fuente Police Station aron kasohan.

Ang mga polis miinsister nga lehitimo ang ilang operasyon ug wala silay nahimong kalapasan sanglit ang ilang girespondehan armado og mahait nga hinagiban unya misuway pa sa pagdunggab kang Trangia. - BANAT NEWS