Ginang gi-raid tungod sa pagbaligya'g shabu

CEBU, Philippines - Usa ka ginang nga gipasanginlang tigpayuhot og ginadiling drugas nasikop sa kapulisan sa probinsya human gironda ang panimalay niini sa miaging alas- 3 sa hapon diha sa barangay Sabang siyudad sa Danao.

Ang mga sakop sa Provincial Anti Illegal Drugs Special Operation Task Group (PAIDSOTG) pinangulohan ni Supt. Teofilo Seclot ang Deputy Provincial Director for Operation malampusong misikop sa suspetsadong drug pusher nga si Florita Peñas nga molupyo sa nahisgutang lugar pinasikad sa search warrant nga giisyu ni Hon. Judge Marilyn Yap sa Regional Trial Court Branch 28 sa dakbayan sa Mandaue.

Nakuha sa kapulisan mao ang duha ka gagmay’ng pakete, tulo ka sachet nga pulos may sulod nga gituohang shabu ug usa ka timbangan sa drugas.

Si Seclot nga nahinabi sa mga tigbalita kagahapon nagkanayon nga notado na kaayong mamaligyaay og drogas si Peñas sa maong lugar nga gitawag nila didto sa Danao og “Nicaragua.”

Matud pa ni Seclot nga subay sa ilang impormasyong nadawat si Peñas makahalin og usa ka bultong shabu matag semana diha sa ilang lugar hinungdan nga ilaha kining gi-test buy niadtong bulan sa Disyembre.

Si Peñas natala sa drug personalities sa maong dakbayan ug naa sa level 2 tungod sa gidaghanon sa shabu nga mahalin niini matag semana.

Kasong possession sa Section 11 sa Republic Act (RA) 9165. - BANAT NEWS