Gipatay sa tulisan

CEBU, Philippines - Usa ka drayber sa habal-habal ang giilogan sa iyang motorsiklo ug pagkahuman gipatay sa duha ka wala mailhing mamumuno sa miaging pasado alas-10 sa gabii diha sa Fulton St,. sa barangay Apas siyudad sa Sugbu.

Ang biktima giila ni PO2 Lou Pagara nga si Ranses Ong, 35, taga dalan Escario sa barangay Camputhaw ug nanginabuhi pagpamasahero og habal-habal.

Si Ong giila sa iyang ‘half-brother’ nga si James Ondoy diha sa punerarya kagahapon. Matud pa ni Pagara, base sa impormasyong ilang nadawat gikan ni Ondoy nga gisakyan kini og duha ka lalaki diha sa may dalan Gorordo atubangan sa usa ka bakery.

Giingong nagpahatud ang mga gikatahapan ngadto sa Plaza Housing apan wala na makauli ang biktima.

Sa pasiunang pakisusi sa kapulisan sa Homicide Section nagbutyag nga ang mga nakasaksi nakakita sa biktima nga maoy nagmaneho sa motorsiklo ug dunay sakay nga duha ka angkas nga nahiagi sa nahisgutang lugar.

Giingong gipugngan ang biktima sa duha ka angkas niini nga makalingi-lingi sa dapit, apan paglabay sa pipila ka minutos nakadungog nalang ang mga residente og buto sa armas dayon nakita nila nga mibalik ang kolor puwa nga XRM nga motorsiklo nga duha nalang ang sakay niini.

Daling gisusi sa mga residente sa dapit ug nakit-an nalang ang biktima diha sa daplin sa karsada nga naglunang sa kaugalingong dugo nga may samad pinusilan sa tuo nga liog nga maoy gituohang namatyan niini.

Ang kapulisan nga miresponde sa alarma walay nakuha nga kabhang sa kalibre sa armas ug gituohan nga revolver ang gigamit sa kriminal, nagtuo ang kapolisan nga posibleng gituyo pagdala ang biktima diha sa maong dapit aron patyon sa maong lugar.

Dako karon ang pagduda sa kapolisan nga posibleng tulis ug carnapping ang motibo sa maong krimen.

Si PO3 Victor Ruel Ayuman sa Homicide Section sa Cebu City Police Office (CCPO) nga nahinabi sa Banat News nagkanayon nga gidul-itan sa pagpusil ang tuong liog sa biktima tungod sa nakita niini nga “tattoing.” - BANAT NEWS