Empleyado sa MEPZ gitulis

CEBU, Philippines - Napugos ang usa ka babaye sa pagtugyan sa iyang salapi ug mga alahas ngadto sa duha ka tulisan sa kahadlok nga dunggabon siya niini didto sa dalan Maximo Patalingjug Avenue sa barangay Pajo, dakbayan sa Lapulapu sa miaging buntag.

Ang biktima mao si Maria Flores, hingkod , nga taga barangay Basak, dakbayan sa Lapulapu ug nagtrabaho sa usa ka establisamento sa Mactan Export Processing Zone (MEPZ) sa maong dakbayan.

Si PO3 Elmer Carillo sa Theft and Robbery Section sa kapolisan sa maong dakbayan miingon nga naglakaw sa karsada ang biktima dihang ang duha ka mga lalaki nga kalit lang mitumaw ang mition og kutsilyo kaniya dungan ang pagdeklarar nga tulis.

Dugang pa ni PO3 Carillo nga mapugsanon kuno kaayo ang duha ka mga suspetsado sa pagpangayo sa iyang digital camera, cellphone ug salaping cash nga P5,000 ug uban pa.

Matud pa ni PO3 Carillo nga human makuha ang   mga butang sa biktima, dali usab kaayong mipahilayo ang duha ka tulisan sa maong lugar.

Padayon pang gipangita sa kapolisan ang maong mga tulisan. - BANAT NEWS