10 ka bay patigayon sa Talisay gipasidunggan

CEBU, Philippines - Gipasidunggan sa kagamhanan sa dakbayan sa Talisay ang 10 ka mga balay patigayon kinsa giila nga maayong mamumuhis sa maong dakbayan kagahapon sa gabii, isip kabahin sa pagsaulog sa ika-10th Charter Day sa maong dakbayan karong adlawa.

Ang gipasidunggan mao ang Cebu Southland Commercial Complex, Visayan Electric Company, Ricor Mills Corporation, Dynasty Management Development Corp., Shurline Corp., Freemont Foods Corp./Jollibee, Rose Pharmacy, Geo Transport and Construction Inc., Avon Cosmetics Inc., ug Mercury Drug Corp.

Gumikan sa kamaayo nila mobayad sa buhis, ang dakbayan nakakolekta og kaping P100 milyones nga buhis sa tuig 2010 gikan sa business tax.

Si Talisay City Administrator Richel Bacaltos nagkanayon nga karong tuiga maoy ikaduhang tuig nga mihatag sila og pasidungog ngadto sa top taxpayers.

Aron mahaom sa ikanapulong kasaulogan sa charter day sa Talisay hinungdan nga mipili sila og napulo ka mga buotang mamumuhis niining tuiga.

Ang awarding ceremony gihimo atol sa testimonial dinner kagabii uban usab sa gipasundayag nga audio-visual sa 10 ka mga kalampusan nga nakab-ot sa dakbayan sa natad sa edukasyon, social services, infrastructure, peace and order, youth development, local shelter program ug uban pa. - BANAT NEWS