Papa gipatay atubangan sa mga anak

CEBU, Philippines - Patay ang usa ka 60 anyos nga mag-uuma human kini pusila sa wala hiilhing kriminal samtang nanihapon kauban sa iyang asawa ug mga anak sulod sa ilang payag sa bukirang bahin sa barangay Manatad lungsod sa Sibonga niadtong Lunes sa alas 7:00 sa gabii.

Ang biktima mao si Arquilao Edullantes, 60 , minyo, usa ka mag-uuma sa maong lugar

Si SPO4 Rodilito Carillo sa Sibonga Police Station mibutyag sa Banat News nga wala makaila ang pamilya sa biktima sa kriminal kay igo lang kining midungaw sa bintana dayong pusil sa dughan ni Edullantes.

Matud pa ni SPO4 Carillo nga human sa pagpamusil, dali kaayong nakapahilayo ang kriminal.

Nadala pa ang biktima sa hospital sa lungsod sa Sibonga apan patay na kini sa paghiabot didto.

Ang mirespondeng mga polis nakapunit og basiyo sa bala sa   kalibre .45 nga pistola nga maoy gituohang gigamit sa kriminal.

Sa pagkakaron padayon pang gipanid-an sa kapolisan ang maong hitabo ug gipaabot nga may makabutyag bahin sa ngalan sa kriminal.  - BANAT NEWS