CEBU, Philippines - Pormal nang gisugdan ang implementasyon sa paglahugay sa mga police station commander ug ubang unit sa kapolisan sa dakbayan sa Lapulapu. Matud pa ni Lapulapu City Police Office Director Sr. Supt. Anthony Obenza nga ang maong paglahugay sa iyang mga sakop temporaryo lamang.
Miingon si Obenza nga bisan sila maoy gitudlong mangulo sa ilang unit, kun mamatikdan niya nga dili kini epektibo sa iyang pagdumala, iya kining pulihan sa katungdanan.
Base sa bag-ong kamandoan ,ang bag-ong hepe sa Isla sa Olango Police Station 1, mao si Insp. Damiano Montebon Jr., sa Station 2, Sr. Insp. Junnel Caadlawon, Station 3, Chief Insp. Ceferino Tabay, Station 4, Insp. Manruf Bantog, Station 5, Chief Insp. Conrado Manatad.
Samtang sa mga Special Unit, si Chief Insp. Ma. Elma delos Santos maoy hepe sa Intelligence Section, Supt. Vergil Ranes sa IDMB, Insp. Glenn Hife sa CAIDSOTF, Insp. Juan Capacion, sa Homicide Section ug Insp. William Homoc.
Sa maong bag-ong lahugay si Sr. Supt Obenza nanghinaot nga mamintenar sa maong mga opisyal ang pagpatunhay sa kalinaw ug kahapsay sa ilang tagsatagsa ka hurisdiksiyon. (BANAT NEWS)