CEBU, Philippines - Usa ang patay ug onse ang nangaangol human mabalitok ang multicab nga ilang gisakyan dihang nawad-an og preno sa dulhogon nga bahin sa barangay Agsungot bukirang bahin sa dakbayan sa Sugbu sa miaging alas 4:45 sa miaging gabii.
Sumala pa sa report sa Balitang Bisdak kagahapon patay diha-diha si Hernando Castro, 58, taga dakbayan sa Lapulapu.
Samtang ang mga nangaangol mao sila si Jenny Bentulan, 32, ug bana niining si Nonie, 34, ilang mga anak nga sila si Benjie, 15, Novie, 13, Agaton, 9, ug Mark, 6, pulos taga Gun-ob sa dakbayan sa Lapulapu, Analyn Borres, Roger Borres, 33, taga barangay Guba dakbayan sa Sugbu, Randy Torremocha, 21, taga Paknaan, Genaro Torremocha, 10, taga Kalawisan Lapulapu, ug Marlon Balar, 33.
Si PO2 Edgardo Becoy sa Traffic Division nga nahinabi sa Banat News mitug-an nga ang multicab gimaneho ni Elvie Abellare, 34, negosyante’g bulad nga taga Purok Yellow bell sa barangay Looc sa dakbayan sa Lapulapu.
Matud pa ni Becoy nga gikan namista sa barangay Guba ang mga biktima ug padulong na kining mamauli sa dakbayan sa Lapulapu apan pag-abot sa dulhogon nga bahin sa nahisgutang lugar kalit lang nawad-an og brake ang multicab hinungdan nga nawad-an usab og kontrol sa manobela si Abellare nga miresulta sa pagkabalintong sa multicab niini.
Matud pang Becoy nga si Castro maoy nagrabihan tungod kay giingong nabuak ang ulo niini hinungdan sa iyang pagkamatay dihadiha dayon.
Samtang ang uban nga nakaangkon lamang og mga samad ug bun-og sa kalawasan dali nga gidala sa Cebu City Medical Center (CCMC). Apan sa report sa Buena Mano Balita kagahapon usa sa mga pasahero ang mibutyag nga adunay ‘misteryosong’ tiguwang nga mi-hitch kanila ug nanaog sa usa ka sementeryo sa maong lugar.
Giingong human mokanaog ang tiguwang mipahimangno kini kanila nga maghinay-hinay sa ilang biyahe kay ‘taw-an’ ang maong dapit ug pipila ka segundos ang milabay nahitabo dayon ang aksidente.
Si Abellare nga nahinabi sa Banat News samtang diha kini sulod sa karsel nagkanayon nga lima ra ka buok ang iyang sakay gikan sa dakbayan sa Lapulapu nga pulos niya paryente.
Matud pa niya nga wala siya makabantay sa uban nga nanakay sa iyang multicab. Giangkon ni Abellare nga nawad-an gyud og preno ang iyang multicab ug gipugngan aron dili sila mahulog sa pangpang. (BANAT NEWS)