Driver nawingig gisumbag sa nangilkil

CEBU, Philippines - Usa ka drayber sa public utility vehicle (PUJ) nawingig ang dagway human kini sumbaga sa nangilkil kaniya didto sa barangay Tabunok, dakbayan sa Talisay sa miaging hapon.

Ang biktima mao si Uldarico Ycot Jr., 22, taga barangay Linao, dakbayan sa Talisay kansang nawong mihuboy sa kabun-og human siya sumbaga ni Eyo Entienza, hingkod, nga taga barangay Pardo, dakbayan sa Sugbo.

Sumala sa kapolisan nga samtang paingon nang mobiyahe ang biktima ngadto dakbayan sa Sugbo gikan sa Tabunok, mihunong si Ycot diha sa usa sa mga lugar sa Tabunok aron magpasakay og mga pasahero.

Si Entienza giingong miduol sa biktima ug nangayo og P20 apan P10 ray gihatag ni Ycot.

Busa sa kapungot ni Entienza gikalitan og sumbag ang nawong ni Ycot busa puwerting huboya niini. 

Wala pa matagbaw si Entienza gibato pa gyud niini ang sakyanan nga gimaneho ni Ycot. - BANAT NEWS