CEBU, Philippines - Pipila ka adlaw human sa general assembly sa tanang mga kawani sa Kapitolyo, si Gobernador Gwendolyn Garcia nanghatag dayon og ganti ngadto sa 18 ka mga kawani sa Kapitolyo nga nagtinarong sa ilang trabaho.
Ang maong ganti mao ang pag-promote sa ilang posisyon kay namatud-ang nagbinut-an sila sa ilang tagsa-tagsa ka trabaho.
"As your governor, I shall repeat what I have always said good work will be rewarded; sloppy inefficient behavior will be dealt with accordingly. I do hope with the continually evolving performance evaluation system that we shall now be implementing for this year, adunay gamay nga kausaban dili na maka-focus on target nga gipahimutang without correlating it to the bigger picture," sigun pa ni Garcia.
Ang na-promote nga mga kawani nanumpa dayon sa atubangan ni Gobernador Garcia.
Ang pangulo sa Provincial Human Resource Office (PHRO) Noli Valencia nagkanayon nga mao kini ang labing unang pagpapanumpa sa mga gipang-promote nga mga empleyado atubangan sa gobernador kay kaniadto ang oath taking adto ra man atubangan sa mga department head.
Si Valencia miingon nga mao kini ang unang batch nga nahatagan og promotion karong tuiga ug may dugang pang i-promote human niining grupoha tungod gihapon sa maayo nilang performance.
Sigun pa ni Valencia nga ang nag-unang basehanan sa promotion mao ang kataas nga moral sa mga empleyado ug kamasinugtanon sa rules and regulations sa Kapitolyo.
Dugang pa ni Valencia nga ang gobernador andam kaayo nga mohatag og promotion niadtong kugihan ug kinasingkasing ang pagserbisyo sa kalungsoran sama sa gihimo sa gobernador. - BANAT NEWS