Tanod nga nagdisko giluba angol

CEBU, Philippines - Samaran ang usa ka barangay tanod human dunggaba sa usa ka lalaki atol sa gipahigayon nga disko  didto sa sitio Lomboy, barangay Bagtik lungsod sa San Remegio, kagahapon pasado alas 2:00 sa kaadlawon.

Ang biktima nailhan nga si Adonis Cogal Jr., 32, molupyo sa barangay Bagtik, kinsa usa ka barangay tanod, samtang ang gitumbok nga suspetsado mao si Michael Pepito, hingkod, nga taga barangay Calambua sa maong lungsod.

Base sa inisyal nga imbestigasyon sa kapolisan sa maong lungsod nasayran nga ang suspetsado wala maka-uyon sa gibuhat sa biktima sa pakigparis niini og sayaw sa iyang pag-umangkon sa disko.

Sa kasuko niini milanit sa iyang kutsilyong gitangkil ug gidiretso og duslak sa walang dughan sa biktima.

Tungod niini ang biktima gidali pagdala sa Don Severo Verallo Memorial Hospital samtang ang suspetsado dali usab nga naka-ikyas human sa maong panghitabo.

Ang kapolisan padayon pang nangita sa suspetsado aron paatubangon   sa sala nga iyang nahimo. - BANAT NEWS