Davide gipasidunggan ni Vidal

CEBU, Philippines - Gipasidunggan kagahapon sa hapon ang Argawanong kanhi Chief Justice Hilario Davide Jr. sa labing taas nga award sa Simbahang Katoliko nga gitunol ni Archbishop Ricardo Cardinal Vidal.

Ang maong pasidungog mao ang Knight of the Grand Cross of Saint Sylvester diha sa Blessed Pedro Calungsod Shrine sa Archbishop’s Palace.

Gipasidunggan si Davide gumikan sa iyang dakong natampo sa nasud ug sa iyang mga nabuhat sa simbahan ug nahimong ehemplo sa pagka-independente dihang siya pay chief justice sa Korte Suprema sa administrasyong Arroyo.

Nasayran nga ang maong award maoy pinakataas nga award nga mahatag ngadto sa usa ka lay person nga nakahimo og kaayuhan sa Simbahan ug sa publiko. Sa iyang termino wala’y negatibong mga pagsaway nga gibato diha kaniya hangtod nga kini miretiro.

Si Davide mao karon ang pangulo sa giumol nga Truth Commission ni Presidente Benigno Noynoy Aquino III nga mo-imbestigar sa mga hiwi nga nabuhat sa kanhi administrasyon ni presidente ug karon Kong. Gloria Macapagal Arroyo. (BANAT NEWS)