Liso og pangisip moambak unta sa bridge

CEBU, Philippines - Wala mahinayon ang paghikog sa usa ka tawo sa 1st Mactan –Mandaue bridge human kini masanta sa mga otoridad sa kagamhanan sa dakbayan sa Lapulapu kagahapon sa alas 10:00 sa buntag.

Si SPO2 Rolando Pogoy sa Lapulapu Police Station nga nahinabi sa Banat News miila sa maong lalaki nga mao si Leon Dayola, 58, minyo nga taga Taboan, dakbayan sa Sugbo kinsa talitugpa na sa dagat habig sa barangay Pajo, dakbayan sa Lapulapu  dihang naabtan kini sa mga tinugyanan sa Special Rescue Unit (SRU) sa maong dakbayan.

Matud pa ni SPO2 Pogoy nga si Sr. Supt. Anthony Obienza , hepe sa kapolisan sa Lapulapu maoy unang nangayo og panabang sa mga frogmen sa Philippine Navy ug sa mga mananagat sa Lapulapu aron saw-on si Dayola kun mahinayon kini sa pag-ambak sa tulay.

Dugang pa niya nga si FO1 Eleuterio Baguio sa SRU sa kabomberohan sa maong dakbayan migamit sa ilang ladder ug maoy mikombinser   sa taliambak nang si Dayola nga dili ihinayon ang iyang paghikog.

Si FO1 Baguio nga nahinabi sa mga tigbalita mitug-an nga ang bug-at nga problema ni Dayola mao ang pagdispalko niini og dakong kantidad nga salapi gikan sa iyang amo.

Busa ang gihimo ni Baguio mao ang pagpasabot   kang Dayola nga dili nalang maghikog kay tabangan siya nga mabayran ang iyang nadispalkong kuwarta.

Apan si SPO2 Pogoy nga miimbistigar usab kang Dayola nagkanayon nga lain usab ang version sa problema ning tawhana nga gitug-an kaniya kay ang kagamay kuno sa iyang suweldo maoy hinungdan nga magpakamatay nalang siya. Si SPO2 Pogoy nagtuo nga may deperesnya sa pangisip si Dayola. (BANAT NEWS)