CEBU, Philippines - Si PRO-7 Chief Supt. Ager Ontog Jr. mipahibawo nga hatagan niya og 140 ka mga handheld radio ang Cebu City Police Office (CCPO) aron magamit sa komunikasyon sa kapulisan atol sa Sinulog Mardi Gras nga ipahigayon karung sunod semana.
Si Ontog nagkanayon nga iya usab pahingusgan ang intelligence monitoring tibuok Central Visayas, magpatuman sa police visibility sa mga lugar dinhi sa dakbayan aron mapugngan ang mga kreminal. Giklaro usab niini nga ila pang sutaon og maayo ang reports nga dunay miyembro sa teroristang Abu Sayyaf gikan sa Mindanao nga naabot didto sa lalawigan sa Bohol.
Gani karung sunod semana gikatakdang magtigom ang kadagkuan sa kapulisan alang sa Regional Intelligence Coordinating Council (RICC) alang sa preparasyon sa Sinulog Festival.
Ang kapolisan sa Sugbu mipatuman sa Special gun ban dinhi sa dakbayan ug matapos karung Enero 17 liwas sa Sinulog.
Nagpasabot kini nga kadtong mga tawo nanag-iya og lisensyadong armas dili na mahimong makadala niini sa gawas sa ilang panimalay bisan paman og aduna silay permit to carry firearms outside residence (PTCFOR) tungod sa maong special gunban.
Matud ni Ontog sa dili pa ug sa adlaw sa Sinulog ipakatap ang gatosan ka mga pulis nga gi-augment gikan sa Regional Public Safety Batallion, Special Reaction Unit (SRU) ug kasundalohan gikan sa Central Command.
Iya usab iisa sa Red Alert ang kapulisan sa Central Visayas aron walay makalusot nga mga dautang elemento nga planong momugna og kagubot. (BANAT NEWS)