CEBU, Philippines - Ang kagamhanan sa dakbayan sa Talisay gitakda nang mo-implementar sa Integrated Drainage Masterplan (IDM) sugod sa unang kuwarter ning tuiga sumala pa ni Konsehal Rodolfo Cabigas, chairman sa committee on infrastructure.
Matud pa ni Cabigas nga ang unahon sa pagpanganal mao ang mga barangay nga kanunay bahaan sama sa Bulacao ug Cansojong.
Ang buhatan sa City Planning and Development Coordinator (CPDC) mitumbok sa barangay Bulacao ug Cansojong nga labing apektado sa baha kung mobundak ang kusog nga uwan tungod kay ang maong mga lugar walay klarong kanal.
Ang ubang mga barangay nga bahaanan usab mao ang barangay Lagtang, Poblacion ug Pooc.
Ang mga residente sa sitio Tangkong, barangay Poblacion naproblema na sa baha sa ilang lugar tungod kay magpundo kanunay ang tubig.
Ang mga opisyal sa barangay temporaryong nagbutang og mga foot path nga malatayan sa tawo apan matud usab sa mga residente nga ang maong mga footh path dili magsilbi tungod kay moabot hangtod sa tuhod ang tubig kung mobunok ang kusog nga uwan.
Matud ni Cabigas nga i-implementar nila ang proyekto ubos sa “phase by phase” tungod sa kakuwang sa pundo.
Ang siyudad migahin og P10 milyones nga pundo alang sa first phase apan matud ni Cabigas nga nagkinahanglan ang kagamhanan og P100 milyones nga pundo alang sa kinatibuk-ang magasto sa maong proyekto.
Ang IDM nagsugod sa pagtuon niini niadtong tuig 2007 pinaagi sa SPACESystems. 4719 usa ka drainage consultancy firm nga maoy gikuha sa siyudad aron motuon sa tukmang sistema sa panganal sulod sa lima ka buwan.
Apan niadto lang milabay’ng duha ka semana isumiter sa maong buhatan ang resulta sa ilang pagtuon sa maong drainage system plan.
Kahinumdoman nga si Konsehal Romeo Villarante kinsa usa ka oposisyon nagkanayon nga angayan nang pasakaan og kaso ang SPACESystems tungod sa kadugay niining misumiter sa resulta sa ilang pagtuon nga nakaapektar pag-ayo sa plano sa siyudad sa pagpatuman sa maong proyekto. (BANAT NEWS)