Gipatay'ng bayot way miila

CEBU, Philippines - Hangtud karun wala gihapoy ni-claim sa patay’ng lawas sa usa ka mahuyang nga biktima sa salvage nga gidala sa transcentral hi-way sa sitio Buwawan sa barangay Pung-ol, Sibugay niadtong Huwebes sa kaadlawon nga gibaatan og packaging tape ang kamot ug tiil ug gi-blind folded ang nawong gikan sa mata hangtud sa iyang liog ug didto na kini pusila.

Si Raul Aldave sa Saint Francis Funeral Parlor nanawagan karun sa publiko nga kung si kinsa kadtong nawad-an sa minahal sa kinabuhi nga duawon ang ilang punerarya ug ilhon ang biktima.

Matud pa ni Aldave nga hangtud kagahapong adlawa wala pay nipatim-aw sa ilang punerarya nga nag-ila sa biktima.

Sa nasayran ang biktima dunay mga samad pinusilan sa ulo, lawas ug tuong bukton ug gibilin sa kanal sa Transcentral Hi-way.

Ang biktima nalabyan sa usa ka Marino Englatira, habal-habal drayber sayo niadtong Huwebes sa buntag nga naghatud og pasahero sa barangay Gaas lungsod sa Balamban.

Gihulagway ang biktima nga nagpangidaron 35 ngadto sa 40 anyos, mubo ang buhok apan labong, gibana-banang gitas-on nga 5’4”, kasarangan ang gidak-on sa panglawas, dunay tattoo sa tuong bukton nga Jaycam “Z” katapusang nagsul-ob og short nga slacks kolor blue, camouflage nga brief, t-shirt nga stripes nga may kombinasyong dark green ug puti ug wala nay tsenilas.

Nakuha sa kapulisan ang siyam ka kabhang sa .45 nga kalibre sa armas, duha ka deformed slugs ug tulo ka fragments.

Ang Homicide Section wala pa say miadto kagahapong adlawa aron magpakisusi kun ilaha bang kabanay ang gi-salvage sa Transcentral Hi-way hinungdan nga wala pa gyud silay lead si kinsa ang responsabli sa kremin. (BANAT NEWS)