CEBU, Philippines - Mabulokon nga gilusad kagahapon sa pasado alas 2 sa hapon ang Sinulog Launching Parade nga nagsugod sa Basilica del Sto. Niño paingon sa Cebu City Sports Complex diin gilangkuban kini sa nagkalain-laing tulunghaan sa siyudad isip mga street dancers.
Atol sa maong opening and launching program gipahigayon usab ang presentation sa mga kandidata sa pagahimoong Ms. Cebu beauty pageant didto sa Fuente Osmeña Circle sa pagka- alas 7:30 sa gabii.
Lakip usab nga gipresentar ang Sinulog Idol sa Fuente ug mipahigayon og street party bands pagkahuman sa maong kalihokan.
Si Mayor Michael Rama ang over-all Chairman sa Sinulog 2011 mibutyag sa mga tigbalita nga daghan gyud ang moanhi sa Sugbo atol sa Sinulog mao nga gipanghingusgan niya ang pagpakigtambayayong sa CITOM alang sa mga rerouting nga mahitabo atol sa fiesta.
Ipahigayon usab karong adlawa ang Sinulog sa Kabataan sa Lalawigan ug ang labing unang Sinulog Football Cup didto sa University of San Carlos (USC) Talamban Football Field.
Samtang sa laing bahin gisugdan kagahapon sa alas 9 sa buntag ang pag-inspeksyon sa mayor sa 10 footer nga toilet van nga nahimutang sa Fuente Osmeña.
Aduna pay umaabot nga tulo ka toilet van nga usa sa giandam sa kagamhanan alang sa umaabot nga Sinulog 2011. (BANAT NEWS)