Capitol ug CH officials mag-abot karon pagtuki sa 93-1 ordinance

CEBU, Philippines - Mag-abot karong adlawa, Enero 7 ang mga representante sa siyudad sa Sugbo ug sa kagamhanan sa lalawigan sa Sugbo aron sugdan ang panagsabut-sabot alang sa kasulbaran sa 93-1 Ordinance.

Si Gob. Gwendolyn Garcia nagkanayon nga si Capitol Consultant on Information Atty. Rory Jon Sepulveda maoy mutambong sa one-on-one meeting ngadto ni Cebu City Administrator Jose Mari Poblete nga mao usab ang representante sa city hall.

Si Sepulveda sa iyang bahin nagkanayon nga andam na siya alang sa one-on-one meeting uban ni Poblete sa city hall karong Biyernes.

Apan nagdumili na kini sa pagsulti kun asa dapita ipahigayon ang maong tigum ug unsa ang unod sa ilang pagahisgutan.

Dihang gikuhaan og pamahayag ang gobernadora kini nagkanayon nga dili siya gusto nga unhan ang resulta unya sa labing unang sabot-sabot sa City Hall ug sa Capitol ug iya na lamang paabuton ang resulta niini. Samtang giklaro usab sa gobernadora nga ang rules ni Department of Interior on Local Government kon DILG secretary Jesse Robredo sa maong isyu mao ang kalihim maoy naningkamot nga matuman ang panagsabutsabut tali sa siyudad sa Sugbo ug sa lalawigan.

Gipasabot usab sa gobernadora nga ang tuyo sa iyang giingong nga gihuptang alas mao lamang ang paghatag og mensahe ngadto sa pipila ka mga personalidad nga hunongon na ang pagbungat og makadaut nga pamahayag. - BANAT NEWS