P700 mil danyos sa sunog

CEBU, Philippines - Mokabat sa P700,000 ang gibiling danyos sa upat ka minutos nga sunog sa usa ka diving shop nga gipanag-iya sa usa ka Koreano ug kabalayan sa barangay Marigondon sa dakbayan sa Lapulapu nga gialarma alas-7 ang takna sa miaging gabii.

 Si SFO1 Atilano Beredo, imbestigador sa kabomberohan sa maong dakbayan nga nahinabi sa Banat News miingon nga ang nasunog mao ang Ocean Player Diving Shop nga gipanag-iya sa usa ka Jhung Moon Lee nga nag-abang sa duha ka andanang edipisyo nga ginama sa light materials.

Si City Fire Marshall Ricardo Cornella ang miisa niini ngadto sa third alarm hinungdan sa pagtabang sa kabomberohan sa Philippine Air Force, Emergency Rescue Unit Foundation (ERUF) ug Agus Fire Brigade.

 Dugang pa ni Beredo nga lakip sa nakasinati og mga kadaut ang walo ka mga cottage nga gipanag-iya ni Atty. Esteban Gochan, panimalay nga gipanag-iya ni Edilberto Sumalinog ug Victor Papua nga nahimutang sa sikbit nga bahin niini.

Sumala pa ni Beredo nga nagsugod ang kalayo sa sulod sa buhatan sa maong diving shop nga nahimutang sa ikaduhang andana niini ug daling mikaylap. Usa sa gitutukan ang electrical misuse nga nakaingon sa kalit nga pag-ulbo sa kalayo. - BANAT NEWS