Lola patay human madasmagi sa van

CEBU, Philippines - Patay ang usa ka 60-anyos nga babaye human kini madasmagi og sakyanan sa iyang pagtabok diha sa karsada aron unta magpalit og sud-an alang sa panihapon sa highway sa barangay Lipata lungsod sa Minglanilla niadtong Miyerkules sa alas 7:00 sa gabii.Ang biktima mao si Francisca Sebial Pabroa, molupyo sa San Isidro lungsod sa San Fernando. Samtang ang drayber sa close van nga puno sa karneng baboy mao si Jaime Gerardo Gimarangan, 55, minyo, taga sitio Bas, barangay Pagsabungan siyudad sa Mandaue.

Matud ni PO1 Rodulfo Quilala sa Minglanilla Police Station dihang nahinabi sa Banat News nga ang biktima paingong magpalit og sud-an alang sa ilang panihapon nga nagpayong tungod sa nasinati nga uwan-uwan niadtong higayona.

Samtang ang close van nga puno sa kargang karneng baboy gikan sa habagatang bahin paingon sa dakbayan sa Sugbo.

Matud pa wala makabantay ang drayber sa biktima nga nitabok na diha na sa taliwa sa karsada kinsa niadtong higayona nagduha-duha kini nga paingong mo-atras unya mo-abante dihang nakamatikod sa nagsingabot nga sakyanan.

Wala na makatamak sa preno pa ang drayber ug nadasmagan gyud ang biktima ug natumba kini dihang nasaghiran ang lawas ug nalatayan pa gyud sa atras nga bahing ligid sa sakyanan.Ang drayber nipasutoy og padagan pahilayo kay nahadlok sa mga paryente ug mga estambay sa lugar ug didto na mitahan sa iyang kaugalingon sa kapolisan sa siyudad sa Talisay.Ang kapolisan sa Talisay mi-turn-over sa drayber ngadto sa kapolisan sa Minglanilla.

Ang biktima gihatod dayon sa mga niresponde nga pulis ngadto sa Minglanilla District Hospital apan wala na kini makaabot nga buhi sa maong tambalanan.Ang drayber nagtingkagol karon sa Minglanilla detention cell naghuwat sa tukmang kasong ipasaka batok kaniya.  - BANAT NEWS