Midaog sa 'swertres' giluba sa asawa

CEBU, Philippines - Usa ka lalaki nga giingong nakadaog sa “swertres” sa lotto ang gidunggab sa iyang asawang mabdos tungod sa giingong paggasto niini sa iyang daog ngadto sa barkada sa J.M Basa Ext. sa baranggay Sawang Calero pasado alas-11 sa milabay’ng gabii.

Ang biktima mao si Ernesto Cabanles Israel, 38, welder ug mulopyo sa maong nahisgutang lugar samtang ang suspetsado mao ang iyang asawa nga si Oronata Ompad Israel, 37, kinsa pito ka buwang mabdos sa ilang ikaupat nga anak.

Matud sa biktima nag-inom sila ni Berny Lagare ug Rogelio Ompad sulod sa ilang balay dihang mitumaw ang ilang panaglalis sa asawa kabahin sa kwarta nga misantop sa pagpanunggab kaniya.

Sa pakighinabi sa Banat News ni PO2 Geoffrey Gutual sa Cebu City Police Office (CCPO) ang biktima nakadaog og swertres sa lotto ug iyang gitagaan ang suspetsado og P3 mil.

Apan giingong gikasuko sa suspek nga giibanan sa biktima ang kwartang ipalit og kahoy ug gipalit na hinuon og bino aron ipainom sa mga higala. Tungod sa kasuko sa suspek matud pa ni Gutual mikuha kini og kutsilyo dayong dunggab makaduha sa ulo ug walang bahin sa dughan sa biktima.

Ang biktima daling gidala sa iyang kabanay nga si Lagare gamit ang traysikad ngadto sa Cebu City Medical Center (CCPO) samtang ang suspetsado daling miikyas.  - Ryss Marie R. Cabando ug Kristel Cordero (BANAT NEWS)