CEBU, Philippines - Napilian ni Gob. Gwendolyn Garcia ang Bonga Festival sa lungsod sa Sibonga nga iyang sayawan atol sa Sinulog grand parade karong Enero 16 samtang gipahibalo niining andam modonar ang Kapitolyo og salapi kun duolon sa Sinulog Foundation sama sa iyang gibuhat kaniadto.
Ang kapitolyo naandan nang mohatag og cash sa Sinulog Foundation aron matabangan ang maong foundation sa mga galastuhan sa maong kalihukan.
Niadtong milabay’ng tuig, mihatag og P2 milyones ang lalawigan ngadto sa Sinulog Foundation nga diriyot usab nakapagubot tungod sa pagsaway ni kanhi mayor ug karon Kong. Tomas Osmeña. Samtang gipapahibawo ni Garcia nga ang iyang pagsayaw kini agi sa iyang pagtando sa imbitasyon ni Sinulog Foundation chairman Ricky Ballesteros.
Si Garcia motambong sa Sinulog sa Kabataan sa Lalawigan karong Domingo diin siya ang pahatagon sa premyo sa mananaug isip gobernador sa lalawigan sa Sugbo.
Gipasabot ni Garcia nga halad sa Balaang Bata nga si Sr. Sto. Niño ang iyang pagsayaw sa Sinulog matag tuig. Kini ang ika-unom nga higayun nga misayaw ang gobernador sa Sinulog sa dakbayan sa Sugbo.
Matag tuig, mopili si Garcia sa grupo nga iyang kuyugan sa pagsayaw labi na sa mga ilado nga festival sa kalungsuran ug usa sa rason mao nga ang iyang adlaw natawhan mao usab ang kapistahan sa patron sa simbahan sa Sibonga nga ang Our Lady of Pilar.
Ang Bonga Festival maoy midaog sa ikaduhang dapit sa Pasigarbo sa Sugbo sa niaging tuig sa Cebu International Convention Center. - BANAT NEWS