CEBU, Philippines - Gikalipay ni RTC Branch 58 Judge Gabriel Ingles nga usa siya sa 13 nga na-nominated sa Judicial and Bar Council nga papilian kang Presidente Benigno ‘Noynoy’ Aquino III aron molingkod isip hurado sa Court of Appeals.
Matud pa ni Ingles nga dako kaayo ang iyang garbo nga siya rang usa nga Sugbuanon ang naapil sa gi-nominate sa JBC nga kompirmahon ni Aquino apan giklaro niya nga dili siya sigurado kun makakuha ba gyud siya niini tungod kay 50-50 chance lamang ang iyang kahigayunan niini.
Nasayran nga ang Clerk of Court sa Korte Suprema Enriqueta Esguerra-Vidal mipahibawo ni Ingles nga usa siya sa nalakip sa "shortlist of nominees" sa JBC nga gisumiter ngadto sa buhatan ni Presidente Aquino alang sa kompirmasyon.
Si Ingles nagsilbi isip judge sa RTC-7 Branch 58 sulod na sa siyam ka tuig. Misumiter siya sa iyang application alang sa nabakanteng posisyon sa Court of Appelas niadtong Septiyember 13, 2010 ug gi-interview niadtong Nobiyembre 19 sa niaging tuig.
Si RTC-7 Executive Judge Mienrado Paredes nahinugon kang Ingles kun kini mabalhin sa CA sanglit dako kaayong kawad-on kanila ang maong huwes apan nagtuo siyang mas dako og matabang si Ingles ngadto sa Court of Appeals. - BANAT NEWS