CEBU, Philippines - Gipahibalo ni Mayor Michael Rama nga mosalmot ang mga opisyales sa kagamhanan sa siyudad sa Sugbo sa umaabot nga fluvial procession nga kabahin sa relihiyosong kalihukan sa kapistahan sa Balaang Bata nga si Sr. Sto Niño.
Matud pa ni Rama nga himuong ehemplo sa paghatag og oras alang sa mga kalihukan nga gipasiugdahan sa mga kadagkoan sa Basilica Minor del Sto Niño ang mga opisyal sa dakbayan.
Nagkanayon ang mayor nga ilado kaayo ang Sinulog matag Enero busa kinahanglang may partisipasyon ang mga opisyal ug ang publiko sa mga rehiliyosong kalihukan sama sa Walk for Jesus , fluvial procession ug solemn procession sa milagrosong imahe ni Sto. Niño.
Kanunay na usab karon nga gitigom sa mayor ang mga sakop sa City Traffic Operation and Management alang sa kaseguroan sa hapsay nga pagpadagan sa trapiko samtang nag-angat ang adlaw sa kapistahan.
Samtang gipadayag ni Konsehal Nida Cabrera nga mihangyo karon ang siyudad ngadto sa mga kadagkoan sa Central Command nga ablihan unta niini ang ilang tugkaran aron mahimong alternatibong agianan sa mga pribadong sakyanan karong Enero 16 nga gituohan nga maghuot ang dagan sa trapiko sanglit mao naman kini ang adlaw sa Sinulog Grand Mardi Gras.
Ang Walk with Jesus manukad sa Fuente Osmeña Rotunda alas-4 sa kaadlawon padulong sa Basilica Minore del Sto. Niño karong adlawa ug gipaabot nga tambungan og liboang mga debotos. Usa ka Santos nga Misa nga iselebrar ni Rev.Padre Rodolfo Bugna ang ipahigayon ug isunod ang pagbutang sa Hermano ug Hermana Mayores pagka-alas 7 sa buntag.
Mao na kini ang ika-445 nga pangilin sa Sr.Sto.Niño dinhi sa Sugbu nga naandan nang dugukon sa liboan ngadto na sa minilyong deboto sukad pa kaniadto. - Sanden J. Anadia, Lemuel Maglinte ug Stephanie Solante (BANAT NEWS)