200 ka balay sa Kalunasan nawad-ag kuryente, balay naguba

CEBU, Philippines - Mokabat ngadto sa 200 ka panimalay ang nawad-an og kuryente sa miaging adlaw sa sitio Upper Awihaw, barangay Kalunasan gumikan sa natumba nga punoan sa Ipil-ipil nga misabod sa linya sa kuryente ug miguba sa usa ka panimalay, wala hinuoy nasamdan sa maong hitabo.

 Ang executive director sa Cebu City Coordinating Council nga si Alvin Santillana nagkanayon nga nadawat nila ang alarma sa alas-4 sa hapon niadtong Domingo busa dali nila kini nga girespondehan.

Sumala pa niya nga gumikan sa kakusog nga hangin natumba ang punoan sa Ipil-ipil ug miigo sa panimalay nga gipanag-iya ni Eddie Macaldo.

Miresponde usab ang mga tinugyanan sa Visayan Electric Cooperative busa mibalik na sa normal ang suplay sa kuryente kagahapon na sa buntag.

Pagkakaron, nagpadayon ang mga sakop sa CCDC sa paglimpyo sa maong dapit. Sa laing bahin, gumikan sa sunod-sunod nga pagbunok sa buwan, gialerto usab karon ang pipila ka mga sangay sa gobiyerno.

Kini naglangkob sa CCDC, Department of Engineering and Public Works (DEPW), Bureau of Fire Protection, Department of Public Services ug Cebu City Police Office diin ang mga kadagkuan niini gitigom sa buhatan ni Mayor Michael Rama niadtong Domingo. 

Nagkanayon si Rama nga sa bisan unsa nga emerhensya, kinahanglan nga kanunay’ng alerto ang “frontline” agencies sa kagamhanan.

Dugang pa sa mayor nga nagsugod na karon ang pag-monitor ang mga sakop sa DEPW kung duna ba’y naguba nga mga kanal. Sumala pa sa mayor nga usa sa iyang gitagaan og pagtagad karon ang pagpalambo sa drainage system aron malikayan ang mga dakong baha sa panahon nga mobunok ang uwan. (BANAT NEWS)