Way 'sorry' alang kang Ramirez

CEBU, Philippines -  “Wala koy angayan nga ipangayo og pasaylo,” kini maoy gibuhiang tubag sa hepe sa kapolisan sa lalawigan sa Sugbo Sr. Supt. Erson Digal human siya gimandoan nga papangayoon og pasaylo ni Medellin Mayor Ricky Ramirez.

Kini may labot sa pasangil ni Ramirez nga nagpataka lang og panudlo ang hepe sa kapolisan kaniya isip suspek sa kamatayon sa sakop sa mayor nga si Edilberto Abao.

Matud pa ni Digal nga wala siya’y angayan nga ipangayo og pasaylo ngadto ni Ramirez tungod kay igo lang siya nga nagtumbok nga usa sa mga suspek sa pagkamatay ni Abao ang mayor.

Kini base usab sa mga affidavits nga iyang nabasa ngadto sa witness nga ilang gihuptan gani dili lang kay usa ka witness ang ilang gikuptan karon hinungdan nga mahulagway ni Digal nga aduna silay lig-on nga ebidensya batok sa mayor ug sa uban pang kaubanan niini.

“I only say that he is one of the suspects, I did not say he is guilty. Ang korte nay magsulti ana kun guilty ba siya,” pasabot pa ni Digal.

Mipasabot usab si Digal nga adunay panahon nga ihatag kang Ramirez aron motubag sa maong pasangil ug kini diha ra sa korte ug ang korte ra usab maoy modesisyon sa maong kaso.

Samtang mipasabot usab si Digal nga kun ugaling ihinayon ni Ramirez ang iyang bahad nga pag-withdraw sa kapolisan sa lungsod sa Medellin wala silay angayan nga kabalak-an tungod kay mangita og paagi si Digal nga masuportahan ang iyang mga tawo sa Medellin.

Matud pa ni Digal nga kun ugaling mahutdan og gasolina ang kapolisan tungod sa pagkawala sa suporta sa mayor mopahigayon nalang sila og foot patrol aron mamentinar ang kalinaw ug kahapsay sa maong lungsod.

Giklaro hinuon ni Digal nga ang labaw’ng maapektahan niini mao gyud ang mga molupyo sa Medellin.

Nakita usab nga usa sa mga solusyon ni Digal mao ang paghangyo og tabang sa Police Regional Office aron tabangan ang kapolisan sa Medellin.

Apan si Gob.Gwendolyn Garcia mipahibalong andam siyang moabag sa kapolisan sa Medellin kun putlan na og ayuda sa lungsod ang mga polis tungod kay dili buot ni Garcia nga masakripisyo ang seguridad ug kalinaw sa mga residente.

“So, we shall see where the provincial government can come in if we need to.Above all paramount importance is the maintenance of peace and order,” matud pang Garcia.

Samtang midumili na pagkomentaryo ang gobernador sa maong kaso tungod kay matud pa niya dili gihapon kini makatabang sa imbestigasyon.

Samtang mihimakak usab si Digal sa pasangil ni Ramirez kalabot sa kapakyas ni Digal sa pagpahibalo ngadto kaniya kalabot sa pag-relieved ni Sr. Insp. Bonifacio Arriesgado.

Matud pa ni Digal nga una niyang gitawgan si Arriesgado ug gipangayo-an og numero ni Ramirez kini aron sila magka-estorya ug tuod man nagka-estorya sila ni Ramirez sa telepono ug gani giingong misugot kini ug mihangyo nga kun mahuman ang imbestigasyon kabahin ni Arriesgado ipabalik gihapon kini sa maong estasyonan.

“As law enforcer, we are just doing our part to investigate, ang amoa lang gyud trabaho lang walang personalan,” matud pa ni Digal.

Ugmang adlawa posibleng mapasaka na ang kasong administratiba ug kriminal batok ni Ramirez ug mga kaubanan niini kun hingpit nang mahuman ang affidavit sa ilang mga saksi diin usa niini mao ang anak sa namatay ug laing usa pa, apan nagdumili pa si Digal pagtug-an sa mga pangan niini.

Ang imbestigasyon sa kapulisan sa probinsya gitugyan na ngadto sa Criminal Investigation and Detection Group (CIDG)-7 ug igo nalang sila moabag niini.

Apan si Ramirez sa gipatawag nga linaing press conference sa usa ka kan-anan sa uptown area sa dakbayan kagahapon midemandang mo-resign nalang si Digal tungod sa kapakyas usab niini pagpahibalo sa daling panahon ni Gob. Garcia sa nahitabo.

Kini sama sa gigamit ni Digal nga rason pagrelibo kang Arriesgado nga napakyas pagpahibalo dayon kang Digal sa nahitabo.

Midemanda usab si Ramirez nga ibalik si Arriesgado sa pwesto ug subling mihimakak sa kalambigitan sa kamatayon ni Abao. (BANAT NEWS)