CEBU, Philippines - Mipasalig ang Kapitolyo nga labi pa nilang ayuhon ang pagdumala sa terminal sa kagamhanan nga ania ning dakbayan niining tuig 2011 aron labi pang mokita kini og dako.
Kini samtang mikapin sa tunga sa milyon ka pesos ang nakolekta sa Kapitolyo sulod sa tulo ka adlaw nga operasyon sa Cebu South Bus Terminal (CSBT) atol sa milabay’ng Pasko.
Sumala ni Provincial Administrator Eduardo Habin nga gikan niadtong Decembre 23 hangtod 25, 2010 mikabat sa P591,656 ang nakolekta sa terminal sa lalawigan.
Matud ni Habin nga ang maong koleksyon naglakip sa tag P5 nga terminal fee kutob sa mga pasahero nga mosulod sa terminal nga milimpyo ang tanan og P323,830.
Samtang ang tag P10 nga bayad sa matag bus nga mo-estambay sulod sa terminal mikabat usab og P255,450 ang koleksyon, samtang ang mgapansayan sa babaye ug lalaki nakakolekta usab P12,376 sulod sa tulo ka adlaw, ma tud pa ni Habin.
Matud pa ni Habin nga labi pa nilang giatiman karon ang maayong pagdumala sa CSBT niining tuiga aron labi pa kining mokita og dako inigkatapos sa tuig.
Midugang siya nga mas dako ang ilang nakolekta karong tuiga itandi sa tuig 2009. (BANAT NEWS)