Giluba sa kauban kritikal

CEBU, Philippines - Kritikal ang kahimtang sa usa ka tawo nga gidunggab sa kauban niini sa trabaho sa dalan A.S. Fortuna sa barangay Banilad, dakbayan sa Mandaue sa miaging tungang gabii.

Ang biktima mao si Edgardo Ruiz, 42, minyo, nga taga purok Tambis sa barangay Casuntingan sa maong dakbayan ug ang suspetsado mao si Leonardo Bacano, 21, ulitawo, nga stay-in worker sa Larsian Barbeque.

Si PO1 Anthony Mendoza sa kapolisan sa Presinto 4 sa barangay Casuntingan sa maong dakbayan nga nahinabi sa Banat News miingon nga ang biktima ug ang suspetsado sa sayo pa nag-inom kauban sa lain pa nilang mga higala.

Sa paglabay sa pipila ka oras sa ilang panag-inom kalit lang gikalalis sa suspetsado ang lain nilang higala nga kauban nila sa inom nga maoy hinungdan nga nasuko usab si Ruiz .

Matud pa ni PO1 Mendoza nga ang kasuko ni Ruiz gipahungaw niini pinaagi sa iyang kinumo nga iyang gilubok sa nawong sa suspetsado.

Gumikan sa kakusog sa kumo   sa biktima, nalipong ang suspek apan nakapasiplat kini sa kutsilyo nga ighihiwa sa barbecue nga diha sa lamesa sa   ilang giinoman.

Diha-diha gipunit kini sa suspek ug gihansak dayon ngadto sa tiyan ug uban pang bahin sa lawas sa biktima nga maoy hinungdan sa pagkaangol niini.

Dali nga gidala ang biktima ngadto sa Gullas General Hospital sa barangay Banilad sa maong dakbayan samtang ang suspetsado kinsa naabtan pa   sa kapolisan didto sa crime scene, dali kining gisikop ug gibalhug dayon sa prisohan. (BANAT NEWS)