CEBU, Philippines - Usa ka wala mailhing lalaki ang napalgang patay nga naglutaw sa kadagatan sa sitio Bangakayanon, barangay Lamintak Sur, lungsod sa Medellin atol sa bag-ong tuig.
Si Emilio Villegas, kapitan sa nahisgutang barangay mi-report sa kapolisan kabahin sa maong insidente.
Ang maong patay’ng lawas napalgan mga alas 10:00 sa buntag nga naglutaw diha sa dagat ug padong na kining madugta.
Sila si SPO4 Proneily Artueza, SPO3 Carlos Candido ug PO3 Henry Labotaña ang daling mitubag sa maong alarma. Ang patay’ng lawas giguroy diha sa baybayon sa lugar ug gihulagway nga kasarangan ang gidak-on niini, gibana-banang dunay gitas-on nga 5’11 ang pamarog, nagsul-ob og gisi na nga kolor puting t-shirt ug gisi nga maong nga karsones.
Ang maong patay’ng lawas gidala ngadto sa Tingoy Funeral Homes sa dakbayan sa Bogo.
Si PO3 Bonifacio Asingua sa Medellin Police Station nga nahinabi sa Banat News nagkanayon nga hangtud kagahapon sa hapon wala pa mailhi ang maong patay’ng lawas ug walay mi-claim usab niini. - BANAT NEWS