CEBU, Philippines - Usa ka drayber sa public utility jeep (PUJ) nga nagbiyahe sa rotang Naga-Basak mireklamo batok sa usa ka traffic enforcer nga lakin-on sa dakbayan sa Talisay tungod kay nasuko nga iyang gitawag og “mam” unya dili na makatarunganon ang mga violation niya nga gibutang sa Temporary Operator’s Permit (TOP) nga giluwat kaniya.
Si Julianito Sabong Jr. mipadangat og suwat sa Banat News sa milabay’ng semana bahin sa iyang reklamo batok kang Pinky Arojado, traffic enforcer sa dakbayan sa Talisay.
Kagahapon sa hapon si Sabong nga nahinabi sa Banat News mibutyag nga niadtong Disyembre 16, 2010 gidakop siya ni Arojado unya dihang iya kining gitawag nga mam isip pagtahod niya, giingong puwerting sukoa sa maong enforcer kaniya.
Matud ni Sabong nga sa wala pa siya sikopa, mihunong siya dapit sa “PUJ Stop” unahan sa McDonalds sa Tabunok tungod kay nagpakanaog siya og pasahero.
Unya giduol siya ni Arojado ug gimandoan siyang palargahon na siya apan tungod kay may gipakanaog pa man siyang pasahero iyang giingnan nga kadiyot lang mam.”
Unya matud pa ni Sabong nga imbis palargahon na siya, gipugngan na siya ni Arojado ug wala na siya palargaha gumikan sa kapungot niining gitawag kuno siyang mam.
Midugang si Sabong nga dihang gipangutana sa laing enforcer si Arojado sa hinungdan nganong wala siya (Sabong) palargaha, miingon kuno si Arojado nga gahi siya (Sabong ) og ulo.
Matud pa ni Sabong nga nakurat nalang siya dihang pagbasa niya sa mga violation nga gisuwat ni Arojado sa TOP, nahimutang didto ang “discourteous, no uniform ug traffic obstruction”.
Unya midugang si Sabong nga human niya pirmahe ang maong TOP, gi-tsekan na usab ni Arojado ang pulong “under protest” ug gidugang ang uban pa niyang kalapasan sama sa “Disregard Traffic Sign (DTS) ug Reckless driving.
Matud ni Sabong nga niadtong Disyembre 20-23, 2010 miadto siya sa buhatan sa legal counsel sa Land Transportation Office (LTO-7) ug giduso ang maong reklamo apan wala mopakita si Arojado ug wala usab ma-release ang iyang lisensiya.
Si Bise Mayor Alan Bucao kinsa maoy nangulo sa Talisay City Traffic Operations Development Authority (TCTODA) sa pakighinabi niini sa Banat News kagahapon nagkanayon nga imbestigahon una niya ang maong hitabo.
Apan dili niya maimbestigar si Arojado kung dili moduso og pormal nga reklamo batok sa maong enforcer si Sabong ngadto sa buhatan sa TCTODA.
Si Bucao mikwestiyon kang Sabong kun nganong didto miduso sa iyang reklamo sa LTO-7 nga unta aduna may opisina sa trapiko ang Talisay.
Matud usab ni Bucao nga base sa iyang evaluation, si Arojado maayo og performance sa trabaho ug gani duha ka beses na kining nakaapil sa seminar ngadto sa LTO kabahin sa balaod sa trapiko.
Si Arojado usa ka job order sa Talisay ug taud-taud na kining nagserbisyo sa siyudad ug ubos kini sa quota ni Konsehal Celiapo Cabuenas.
Si Bucao midugang nga daghang drayber usab ang mga badlongon ug mohunong diha sa lugar nga dili “PUJ stop” ug kasagarang mga drayber nga magpabadlong dili taga Talisay. - BANAT NEWS