CEBU, Philippines - Si Gobernador Gwendolyn Garcia miluwat og kamandoan sa Provincial Legal Office sa paghimo og lakang batok sa mga negosyante og karneng baboy nga nasakmitan og mga frozen meat.
Kini tungod sa paglapas nila sa Administrative Order No. 22 sa Department of Agriculture ( DA) nga nagmando sa higpit nga pagpatuman sa tukmang proseso sa pagbaligya sa mga imported nga karne nga magkinahanglan og mga freezer.
Matud pa sa gobernador nga ang iyang kamandoan iya nang gipiyal kang Provincial Attorney Mariano Martinquilla alang sa daling aksyon batok niadtong malapason sa balaod.
Miingon ang gobernador nga makiglambigit ang Provincial Legal Office sa Cebu Provincial Veterinarian aron mataral dayon sa labing daling panahon sa hukmanan ang mga tawo nga makalaps sa Administrative Order No.22 sa DA .
Sa sayo pa ang gobernador mimando kang Provincial Veterinarian Rose Mari Vincoy nga mopatuman sa gikinahanglanong mga paagi, programa ug kalihokan aron kapugngan ang illegal nga pagpamaligya sa imported nga karneng baboy sa kamerkadohan.
Si Vincoy gimandoan usab sa pagpakig-alayon sa mga mayor sa kalungsoran ug mga component cities ug ingon man sa mga national government agencies alang sa higpit nga pagpatuman sa palisiya sa probinsiya nga nagprotiher sa lokal nga nagbaboyan nga maoy apektado kaayo sa pagbaha karon sa mga imported nga karne sa kamerkadohan sa nasud ilabi na dinhi sa Sugbo.
“I directed the Provincial Veterinarian to implement the necessary measures, programs and activities, in coordination with all the local government units, other concerned government offices and agencies such as but not limited to the Philippine National Police, and other stakeholders,” matud pa sa gobernadora. (BANAT)