CEBU, Philippines - Moabot og 50 ka mga abusadong taxi drayber ang nadakpan sa mga deputized agents sa Land Transportation Office (LTO-7) hangtud kagahapon sukad sa pagpatuman sa programang Oplan Esnabiro nunot usab sa pagdaghan sa mga pasahero tungod sa Christmas Season.
Gibutyag ni LTO-7 regional director Raul Aguilus atol sa interbyu sa usa ka sibyaanan nga ang nadakpan nga mga driver sa taxi mao kadtong gireklamong mamili og pasahero ingon man sa rota nga ilang biyahi-an.
Gipasabot ni Aguilus nga kun mamatud-an ang kabalido sa reklamo batok sa nadakpan nga mga drayber pahamtangan nila kini og silot sama sa pagsuspenso sa lisensiya niini.
Sugod niadtong Disyembre 30 mas gipahugtan pa sa LTO-7 ang pagpatuman sa maong programa pinaagi sa pagpakatap og dugang mga deputized agents sa mga lugar dinhi sa Metro Cebu ilabi na sa downtown ug uptown area dinhi sa dakbayan sa Sugbo nunot ning pagdagsang sa mga pasahero.
Ang kadaghan sa mga pasahero karon maoy nakaingon nga migara ang mga taxi drivers nga mamili og pasahero nga ilang pasakyon ug kung asang destinasyon subay sa ilang gusto.
Gitambagan sa director ang publiko nga siguraduhon pagkuha ang plate number, body number sa taxi ug ilabi na ang pangalan sa drayber ug oras sa pagsakay niini diha pormal nga reklamo aron kahimoan dayun og imbestigasyon pagtino sa ka balido niini. (BANAT)