'Shootout' sa checkpoint

CEBU, Philippines - Napusilan patay ang usa ka lalaki sa pulis human giingong nakigpinusilay kanila diha sa checkpoint sa miaging alas- 9 pasado sa gabii diha sa atubangan sa karaang Cebu Provincial Detention and Rehabilitation Center (CPDRC) nga nahimutang sa M.J Cuenco Avenue, siyudad sa Sugbu.

Ang napusilan patay giila sa kapulisan base sa nakuhang drivers license sa biktima mao si Jonifer Pepito, 29, taga barangay Lataban sa lungsod sa Liloan kinsa nakaangkon og duha ka samad pinusilan, usa sa ulo ug usa sa walang bahin sa iyang dughan nga maoy nakaingon sa hinanaling kamatayon niini.

Segun sa report nagpahigayon og checkpoint ang kapulisan sa Parian Police Station diha sa New Imus Road atubangan nga bahin sa Saint Peter Funeral Parlor pinangulohan sa hepe nga si Insp. Pepito Elostrasos uban sa iyang mga sakop nga sila si PO3 Edmund Tiempo, PO3 Marcelino Sanchez, PO2 Marvin Sanson, PO1 Francisco Amila, PO1 Wilt Harris Almagro ug PO1 Christopher Cuizon nga usa ka Field Training Police (FTP).

Sa imbestigasyon sa Homicide Section pinangulohan ni SPO4 Alex Dacua ug mga kauban nga sila si PO2 Jodan Batucan, PO2 Edario Manatad ug PO2 Julius Regis nagbutyag nga gisita sa mga pulis si Pepito nga maoy nagmaneho sa Honda XRM nga motorsiklo tungod kay nagsapaw-sapaw ang plate number niini.

Human gisusi giingong nakuhaan og duha ka syringe ug ampule sa gituohang Nubain nga gibutang sa U-Box sa iyang motorsiklo ug sa pagkapkap nahikapan sa mga polis ang nagbagal nga armas ni Pepito nga giluklok sa iyang bugan samtang ang kauban niini maoy unang midagan palayo sa lugar.

Si Pepito giingong nakalugnot sa dihang giaksyonan na og layog ni PO2 Sanson ug midagan usab nga nagsuot-suot sa mga kabalayan diha sa sitio F. Villa ug T. Villa sa barangay T. Padilla hinungdan nga nahitabo ang ginukdanay diin gigukod si Pepito ni Sanson ug back-up nga si Cuizon.

Giingong nagpataka nalang og dagan si Pepito nga nagdala na sa iyang armas apan na-corner kini ni Cuizon nga nag-atang nang daan sa eskina nga lutsanan atbang sa karaang CPDRC. Depensa ni Cuizon nga giunhan siya og pusil ni Pepito gamit niini ang .357 rebolber apan wala makaigo ug niining higayona giusban na sab siya pagpusil apan mao lang gihapon wala makaigo kaniya, hinungdan nga mibawos siya pagpusil ug naigo si Pepito.

Nakuha sa crime scene ang usa ka .357 revolver dunay tulo ka buhing bala ug duha ka kabhang sulod sa tambor niini ug duha ka kapsula sa .45 nga kalibre sa armas.

Matud ni Batucan nga ila lang gibutang og ‘fictitious’ ang motorsiklo ni Pepito tungod kay naglinut-od ang plate number niini. Ila usab susihon og maayo ang background ni Pepito kun wala ba malambigit sa pagpanulis dinhi sa dakbayan ug Metro Cebu lakip na motorsiklo tungod sa gipangsapaw niini nga plate numbers.

Si Batucan nagkanayon nga dili arestado si Cuizon apan gikustodiya siya sa iyang hepe sa Parian ingkaso kun ipatawag siya sa Internal Affairs Office (IAS) diha sa Cebu City Police Office (CCPO), matawag siya dayon labot sa maong hitabo.

Matud ni Batucan nga personal ug dunay lisensya ang armas nga gigamit ni Pepito nga Tauros nga .45 nga kalibre. Ila kining ipailawom sa ballistic exam samtang ipaubos usab sa paraffin test si Pepito ug si Cuizon. (BANAT)