CEBU, Philippines - Usa ang patay ug duha ang naangol sa panagbangga sa duha ka motorsiklo diin ang namatay nga drayber niini giingong hubog nga nagmaneho diha sa barangay Kawit sa lungsod sa Medillen niadtong Miyerkules sa alas 4:30 sa hapon.
Ang patay nang nadangat sa tambalanan mao ang drayber sa motorsiklo nga si Blair Beduya, molupyo sa barangay Tapilon lungsod sa Daanbantayan samtang naangol usab ang laing drayber sa motorsiklo nga si Ramsey Alo, 25, molupyo sa Poblacion, Medillen ug ang angkas niini nga si Sergio Buayaban, 20, molupyo gihapon sa maong lugar. Matud ni SPO3 Carlos Condino sa Medillen Police Station dihang nahinabi sa Banat News nga si Beduya gikan pa sa lungsod sa Bogo paingon sa Medillen samtang si Alo gikan sa Kawit Proper.Sa pag-abot sa nahisgutang lugar aksidenteng nagkabanggaay ang duha ka motorsiklo ug nalabay si Beduya og pipila ka metros ug pagtugpa niini sa sementadong karsada nag-una ang ulo niini nga mitugpa.
Ang mga biktima nga pulos nalamba sa karsada daling gitabang sa mga estambay ug gihatud dayun sa Severo Verallo District Hospital apan gideklarar nga dead on arrival si Beduya samtang si Alo ug ang angkas niini gibalhin dayun sa Vicente Sotto Memorial Medical Center (VSMMC).
Matud pa ni Condino base sa pamahayag sa mga tawo kusog kaayong nagpadagan si Beduya ug gituohan pang hubog ug pulos usab wala magsul-ob og helmet. – BANAT NEWS