Langyaw giilad og babaye

CEBU, Philippines - Midangop sa buhatan sa Theft and Robbery Section sa kapolisan sa dakbayan sa Lapulapu ang usa ka British national human kini ilara sa gikahimamat niyang babaye sa miaging adlaw.

Ang biktima mao si Christopher Winterburn, 67, nga temporaryong nagpuyo sa barangay Gun-ob, dakbayan sa Lapulapu.

Sa iyang taho kang PO3 Elmer Canillo, si Winterburn mitug-an nga usa ka babaye nga nagpaila sa ngalan nga Sharon ang iyang gikahimamat sa usa ka balay imnanan sa dakbayan sa Lapulapu.

Gidala kini niya sa iyang balay ug mipalabay sa kagabhion hangtod nga sa pagkasunod adlaw nanuroy sila sa dakbayan sa Sugbo.

Apan pag-abot nila sa usa ka lugar nga daghan og balay sa dakbayan sa Sugbo ang maong babaye nananghid kaniya nga mosulod sa kabalayan ug nagpaabot lamang siya sa usa ka tindahan.

Apan nahingangha na lang ang biktima kay misawop na ang adlaw sa iyang pagpaabot ang maong babaye wala na kini mobalik pa kaniya.

Maoy hinungdan nga mipauli na lang siya sa iyang gipuy-ang balay sa dakbayan sa Lapulapu apan nakurat siya kay   nahanaw na ang duha niya ka mahalon nga cellphone nga nagkantidad og P11,000 ang matag usa niini.

Mitibi ang langyaw sa kalagot ug kapungot, ug nagkanayon ang kapolisan nga dili na kakompiyansahan karon ang mga babaye sanglit ngilngig na kaayo kini modala og ilad. (BANAT)