CEBU, Philippines - Nagtingkagol sa Talisay City detention cell ang usa ka lalaki kinsa giingong hubog human kini gireklamong nanghasi ug namahad sa usa ka tanod sa sitio Salvador, barangay Tanke, dakbayan sa Talisay sa miaging adlaw.
Ang suspetsado mao si Ariel Abarquez, hingkod, nga nagpuyo sa maong dapit. Si Olimar Martenen, 37, sa maong lugar maoy mipasangil nga ang suspetsado nanghasi sa iyang balay ug gipamuak ang tulo ka container nga mineral water.
Sa kahadlok sa biktima, nangayo kini og panabang sa mga tanod diha sa nahisgutang barangay.
Busa ang mga tanod nga sila si Dominic Baguio, Edgar Villarin ug Arturo Daan daling mitubag sa maong hitabo.
Base sa imbestigasyon sa mga polis nga dihang miabot ang mga tanod misamot na hinuon og panghasi si Abarquez ug gihagad pa niini og sinukmagay ang mga tanod.
Si Abarquez giingong namahad ngadto kang Baguio nga nagkanayon “pagbantay og makagawas ko sa prisohan kay hutdon nako ang inyong pamilya”.
Ang suspetsado daling gisikop sa mga tanod ug gidala ngadto sa Talisay City Police Station sa barangay Poblacion. (BANAT)